ئانامغا

مۇنەۋۋەر قۇربان

كۆزلىرىڭدىن تامچىلايدۇ غېرىبلىق،
خىيالىڭنى مۈكچەيتكەندە يالغۇزلۇق.
ئازاب بولۇپ تۆكۈلىدۇ تەنھا كۈي،
ئۆتمۈشۈڭنى ئەسلىتىدۇ يامغۇرلۇق.

كەچكۇز پۇراپ، پىل-پىل يانار يېتىملىك،
ئاۋازىڭنى يۈدۈپ ماڭغان دالىدا.
قارىچۇقلىرىڭ ئېسىلغان شۇ يوللارغا،
سېغىنىشلار تەلمۈرىدۇ ھويلىدا.

ئاھ، يىگانە، غېرىبلىققا تۇتاشقان،
تەلمۈرۈشلەر توزۇپ بارار ھىجرانغا.
ئاۋازىنى ئۇنتۇپ كەتكەن قۇشلاردەك،
يالغۇز ئۆتمۈش ئايلىنىدۇ قىيانغا.

(مەنبەسى: جۇڭگو ئۇيغۇرچە رادىيو تورى، تەھرىر: پولات ئاماننۇرى)