كەت
تىلەكلەر ئىلكىدە تەنە قىلغۇچە،
سۆزۈڭنى ئەگىتمەي ئۆدۇل ئۈزۈپ كەت.
ھەمسەپەر بولما دەپ قىلدىڭ كۆپ خىتاپ،
دېڭىزنىڭ قېتىغا سەنلا ئۈزۈپ كەت.
بىخۇدلۇق بىر مەندىن ئالمىغان رۇخسەت،
ئەس -ھۇشىڭ بولمىسا مېنى ئۇنتۇپ كەت.
چەكمىگىن تارىمنى سازىم سازلاقتۇر،
سازەندە بولمىساڭ مېنى قويۇپ كەت.
قۇيۇندا قالمىغان مېنىڭ جىسمىممۇ،
يوغان كۆز بولساڭمۇ قاراپ قويۇپ كەت.
بىلمىدىم كېلەركى مەنزىلىڭ قاياق،
چېدىساڭ چىناردەك مەغرۇر تۇرۇپ كەت.
ۋۇجۇدۇم تەكتىدە يىلنجار يالقۇن،
ئۇنۇتساڭ چوغىدىن تانماي قېچىپ كەت.
باھادىر ئېتىڭتىم چاپتۇرساڭ نەگە،
قاناتىڭ بولسىلا ئەمدى كېچىپ كەت.
سۆزلەشكە تىللىرىڭ كەلمىسە زاتەن،
خېتىڭنى يۈرەكتىن ئۆزۈڭ سۈرتۈپ كەت.
كۆزۈمدە كۆمۈلدى ھەسرەت مۇردىسى،
تاش يۈرەك بولساڭلا ئاتلاپ ئۆتۈپ كەت.
كۆرمىدىڭ بىر مەھەل مىسكىن چېھرىمنى،
كۈلكىلىك ئاۋازدىن ئەمدى تويۇپ كەت.
ئاتاققا قالسىمۇ مۇز دېگەن يۈرەك،
«مۇز داۋان» ئىلكىدىن كاچكول ئويۇپ كەت.
ئەمەسمەن ناتىۋان ئىگىلمەس روھىم،
مەن ئۈچۈن ئىچ ئاغرىق سالماي قويۇپ كەت.
تۇرماسمەن ئىزىمدا ھۆركىرەر بۇرغام،
شەمشەرۋاز بولساڭ گەر مېنى سويۇپ كەت.
2015-يىلى 4-يانىۋار (قىزىلسۇ)
تىلىۋالدى سىدىق
(مەنبەسى: جۇڭگو ئۇيغۇرچە رادىيو تورى، تەھرىر: مېھرىگۈل خۇدابەردى)
تېخى باھا يوق