سېغىنىش
سۇلايمان ئىسمائىل
يېرىم كېچە قارىدىم ئايغا،
سەنمۇ جېنىم قاراۋاتامسەن؟
ئۈمىد بىلەن ھىجران تۈنىدە،
يۇلتۇز بولۇپ چاقناۋاتامسەن؟
ئاي نۇرىدا يۇيۇنار ئۈنسىز،
بىر ماڭىلا تەئەللۇق دۇنيا.
پىچىرلايمەن سەلكىن شامالغا،
ئۆز-ئۆزۈمگە بولۇپمەن ھەمراھ.
قونۇپ قالدىم سوغۇق قەترىدەك،
مەجنۇنتالنىڭ ياپراقلىرىدا.
سوزۇلماقتا بۇ ئايدىڭ كېچە،
سېغىنچىمدەك يىراق-يىراققا.
مەن يېزىلدىم بولۇپ بىر مىسرا،
چۈشتىن ئۇزۇن، ۋىسالدىن قىسقا.
باش ھەرىپى چىققان يۈرەكتىن،
ئاخىرلىشۇر قارىچۇقلىرىڭدا.
(مەنبەسى: جۇڭگو ئۇيغۇرچە رادىيو تورى، تەھرىر: پولات ئاماننۇرى)
تېخى باھا يوق