سۇدىكى ئاپتاپ
پەرھات باھايىدىن
رەڭسىز رەڭگە كىرمەكتە تىنىم،
سۇدىكى ھۆل ئاپتاپتا.
سىزار قۇياش ئەنسىز قۇملۇقنى،
يۈرىكىمگە شۇ تاپتا.
سۇ دۆۋىسى بارار چوقچىيىپ،
يوق شامالنىڭ ئەس-ھوشى.
چەكسىز سۇدا يالقۇنلىماقتا،
بىر ئەرنىڭ دۇغ تۇرمۇشى.
كۆيدۈرۈۋەتتىم بارچە لەززەتنى،
ئۆز-ئۆزۈمگە ئوت قويۇپ.
ماڭماقتىمەن سۇلۇق يوللاردا،
جان قەرزىمگە قول قويۇپ.
تاشلار ئاقار چاك-چاك يېرىلىپ،
رەڭسىز سۇيۇق ئاپتاپتا.
كۆرمەكتىمەن ئۆزۈمنى ئېنىق،
ھەر دەقىقە ئازابتا.
(مەنبەسى: جۇڭگو ئۇيغۇرچە رادىيو تورى، تەھرىر: پولات ئاماننۇرى)
تېخى باھا يوق